Información xeral
A automatización deixou de ser unha tecnoloxía reservada ás grandes corporacións. Na actualidade existen solucións accesibles, seguras e rendibles que permiten ás empresas alimentarias mellorar a súa produtividade, optimizar procesos e responder con maior flexibilidade aos retos do mercado.
CLUSAGA, en colaboración con Fluitronic, organiza esta formación práctica de dúas xornadas para achegar ás empresas do sector as posibilidades da robótica colaborativa, a robótica móbil e outras tecnoloxías de automatización, desde unha perspectiva sinxela, próxima e directamente aplicable á realidade dunha planta alimentaria.
Ao longo de 12 horas, as persoas participantes combinarán contidos introdutorios con casos reais, demostracións e traballo directo con equipos de automatización. O obxectivo é aprender a detectar oportunidades de automatización e coñecer os criterios necesarios para abordar este tipo de proxectos con éxito.
Estrutura do programa
- Comprender os conceptos básicos da robótica colaborativa e da robótica móbil, así como as súas posibilidades dentro dunha planta industrial.
- Coñecer as aplicacións de automatización máis habituais na industria alimentaria mediante exemplos e casos reais.
- Identificar procesos susceptibles de seren automatizados dentro da súa propia empresa.
- Entender os criterios técnicos e económicos básicos para avaliar e poñer en marcha un proxecto de automatización.
- Experimentar directamente con tecnoloxías e equipos reais e resolver dúbidas con especialistas do sector.
A quen vai dirixido?
- Dirección e xerencia.
- Produción e operacións.
- Enxeñaría e mantemento.
- Innovación e transformación dixital.
- Xestión de proxectos de automatización industrial.
Programa
A formación desenvolverase durante dúas xornadas presenciais e eminentemente prácticas, nas que se combinarán conceptos fundamentais, casos reais e experimentación directa con tecnoloxías de automatización.
As persoas participantes traballarán en grupos reducidos e rotarán por diferentes estacións tecnolóxicas para coñecer de primeira man solucións de paletización robotizada, manipulación de produto, visión artificial, loxística interna e transporte autónomo.
Xornada 1. Introdución e fundamentos da automatización
Duración do módulo: 6 horas
A primeira xornada comezará coa recepción e acreditación das persoas asistentes. A continuación, analizaranse as oportunidades e os beneficios da automatización na industria alimentaria, prestando especial atención á súa capacidade para mellorar a produtividade, a calidade e a competitividade.
Introduciranse os fundamentos da robótica colaborativa e da robótica móbil, as súas aplicacións máis habituais e os criterios que permiten identificar oportunidades de automatización dentro dunha planta.
A xornada incluirá unha primeira experiencia práctica por estacións tecnolóxicas e finalizará coa presentación de casos reais e proxectos de automatización implantados no sector alimentario, analizando os seus resultados e as claves do seu éxito.
Xornada 2. Aplicacións avanzadas e posta en marcha de proxectos
Duración do módulo: 6 horas
A segunda xornada profundará nas aplicacións avanzadas da robótica colaborativa e móbil dentro dunha planta industrial.
As persoas participantes completarán a experiencia práctica iniciada durante a primeira xornada mediante unha nova rotación por estacións tecnolóxicas. Posteriormente, abordarán os criterios técnicos e económicos necesarios para iniciar con éxito un proxecto de automatización.
A formación finalizará cun reto participativo destinado a poñer a proba e consolidar os coñecementos adquiridos durante as dúas xornadas.
Método de formación
A formación terá un enfoque práctico, participativo e orientado á aplicación real da automatización na industria alimentaria.
As sesións teóricas, de carácter introdutorio, combinaranse con exemplos reais, casos de aplicación e demostracións con equipos. As persoas participantes traballarán en grupos reducidos e rotarán por diferentes estacións tecnolóxicas, o que lles permitirá interactuar directamente coas solucións e comprender o seu funcionamento e as súas posibles aplicacións.
As dúas xornadas incorporarán tamén espazos de networking e resolución de dúbidas cos especialistas, favorecendo o intercambio de experiencias e a análise de posibles oportunidades de automatización nas propias empresas participantes.
Tecnoloxías coas que se traballará
Durante a formación, as persoas participantes poderán interactuar con diferentes solucións de automatización e robótica:
Pal Ready de Robotiq
Célula de paletización robotizada totalmente ensamblada, deseñada para facilitar instalacións rápidas e sen necesidade de enxeñaría adicional.
MiR250 con MiR Shelf Carrier 250
Robot móbil autónomo, ou AMR, capaz de recoller, transportar e depositar andeis ou carros de maneira totalmente autónoma dentro dunha planta.
Enabled MC250
Cobot móbil que combina un AMR MiR250 cun brazo de Universal Robots para desenvolver tarefas de manipulación e intraloxística.
Bin Picking con visión 3D
Solución para a selección e colocación automática de alimentos mediante a combinación de visión artificial 3D e robótica colaborativa.
Facultade
Xan González
Robotics Technical Manager · Fluitronic
Aarón Saucedo
Intralogistics Specialist · Fluitronic
Juan Rascado
Robotics Account Manager · Fluitronic
Roberto López
Sales Manager · Fluitronic
Mario Nombela
Global Key Accounts Sales Manager · Teradyne Robotics
Pendente de confirmación.
Alessio Cappellaro
Regional Sales Manager · Robotiq
Pendente de confirmación.
Data
28 e 29 de outubro de 2026
Horario
9:30h - 17:00h e 9:00h - 15:30h
Modalidade
Presencial
Lugar
Santiago de Compostela
Prezo
De balde
Información de contacto
981 556 062 · ext. 2001
SECTORES E ÁMBITOS
