Curso avanzado de negociación internacional

A primeira xornada estará centrada no autodiagnóstico negociador e na construción dun discurso comercial eficaz. As empresas participantes analizarán o seu estilo de negociación, as súas fortalezas e as súas áreas de mellora, e traballarán a forma na que presentan a súa proposta de valor ante potenciais compradores.

Abordarase a preparación previa dunha negociación internacional, a definición de obxectivos, límites e marxe de manobra, así como a adaptación da mensaxe comercial ao mercado, canle e tipo de comprador.

A segunda xornada terá un enfoque práctico e individualizado. Cada empresa traballará tres situacións de negociación aplicadas á súa propia realidade comercial, co obxectivo de adestrar conversacións habituais con compradores e reforzar a defensa da súa proposta de valor.

A través de casos prácticos, as empresas participantes practicarán a xestión de obxeccións, a defensa do prezo, marxes e condicións comerciais, así como a negociación de aspectos vinculados á loxística, exclusividade, volume, prazos ou continuidade comercial.

A terceira xornada estará orientada á negociación con compradores internacionais en contextos reais de exportación, feiras, misións comerciais e axendas B2B. As empresas practicarán como preparar unha reunión internacional, adaptar o seu argumentario ao interlocutor e avanzar cara a oportunidades comerciais concretas.

A sesión permitirá traballar conversacións con importadores, distribuidores, compradores retail, canle gourmet, foodservice ou outros operadores internacionais, prestando especial atención á identificación de sinais de interese comercial e á definición de próximos pasos tras a reunión.