O Instituto Galego de Promoción Económica (Igape), publicou a convocatoria do programa de axudas para a internacionalización dixital das empresas (Galicia Exporta Dixital 2021), cofinanciadas polo Fondo Europeo de Desenvolvemento Rexional, no marco do programa operativo Feder Galicia 2014-2020.
En total, a convocatoria destinará 6 millóns de euros a apoiar ás empresas galegas no desenvolvemento e implantación de plans de internacionalización dixital co obxectivo de achegar medios que lles permitan mellorar a súa competitividade, potenciar as actividades económicas internacionais e o incremento das exportacións.
As axudas concédense en réxime de concorrencia non competitiva -por orde de entrada- acollida ao réxime de mínimis.
Beneficiarios da convocatoria
Poderán ser beneficiarias destas axudas as empresas que cumpran os seguintes requisitos:
- Que sexa unha peme segundo o Anexo I do Regulamento nº 651/2014 da Comisión.
- Que teñan algún centro de traballo en Galicia.
- Que estean dadas de alta en programas avanzados do Igape de apoio á interna-cionalización con informe positivo emitido a partir do 1 de xaneiro de 2013. En todo caso a solicitude de alta deberá presentarse antes da finalización do prazo de presentación de solicitudes de axuda, a través do procedemento do Igape IG192.
- Tamén poderán ser beneficiarias aquelas pemes dedicadas ao comercio comerciante polo miúdo, que non necesitan estar dadas de alta en programas do punto anterior.
- Que estean ao día das súas obrigacións coa Facenda Pública estatal, coa Comunidade Autónoma de Galicia e coa Seguridade Social.
Requisitos principais do proxecto
Só se poderá presentar e aprobar unha solicitude por empresa.
Requírese un investimento mínimo de 25.000€ para pemes e 15.000€ para Comercio Comerciante polo miúdo e un máximo para ambos de 125.000€. De superar este máximo procederase a axustar o gasto ao límite máximo. No caso de empresas do sector da produción agraria e da pesca o gasto subvencionable mínimo debe ser igual ou superior a 15.000€ e máximo de 37.500€ no caso de empresas do sector da produción agraria e 25.000€ no caso de empresas do sector da pesca.
Conceptos subvencionables
A subvención será do 80% dos gastos. En concreto, subvenciónanse os seguintes tipos de gastos:
- CONSULTORÍA necesaria para a elaboración de:
- Diagnóstico de potencial exportador dixital até 3.000 euros
- Plans de internacionalización dixital multicanal até 3.000 euros.
- Plans de mercados electrónicos concretos até 5.000 euros.
- Gastos de asesoría xurídica e legal para a internacionalización dixital até 5.000 euros.
- SOFTWARE de:
- Solucións tecnolóxicas P.I.M. até 6.000 euros.
- Adquisición, programación a medida e integración de conectores entre plataformas e con sistemas de información (ERPs) até 30.000 euros.
- Solucións de analítica e visualización de datos para elaborar cadros de mando con indicadores (KPI´s) até 30.000 euros.
- Solucións de intelixencia automatizada até 22.000 euros.
- Solucións de inbound mercadotecnia internacional até 6.000 euros.
- Creación e adaptación de tendas en liña até 6.000€.
- OUTROS GASTOS de:
- Creación e adaptación de catálogos online até 4.000 euros.
- Campañas de posicionamento SEM até 10.000 euros.
- Solucións de software de pago até 10.000 euros.
Prazo de presentación de solicitudes
As entidades interesadas en presentar solicitude á convocatoria deben facelo a través da aplicación informática http://www.tramita.igape.es, accesible desde a sede electrónica da Xunta de Galicia (https://sede.xunta.gal). O prazo de presentación finalizará o 30 de xuño de 2021 ou, no seu caso, ata que se produza o esgotamento do crédito.
