O Clúster Alimentario de Galicia (Clusaga) organiza o xoves 13 de xuño, no andar -1 do Museo Centro Gaiás (Cidade da Cultura de Galicia, Santiago de Compostela), o seu evento sectorial anual: o Foro e Premios Galicia Alimentación. Como cada ano, o encontro contará con persoas expertas e profesionais da industria alimentaria para analizar os grandes retos globais, abordar cuestións estratéxicas e debater sobre o futuro do sector.
Ademais, a cita acollerá o acto de entrega da X Edición dos Premios Galicia Alimentación, galardóns que recoñecen iniciativas e accións destacadas no eido do sector alimentario galego en dúas categorías: Alimentos e Bebidas, cos Premios ao Produto Excelente e ao Produto Innovador; e Iniciativas do Sector Alimentario, cos Premios á Estratexia de Marketing ou Internacionalización, á Sustentabilidade e á Innovación.
De xeito complementario á celebración do Foro e Premios, que conta coa colaboración da Xunta de Galicia, o Patrocinio Ouro de Caixa Rural Galega, Gadisa e Vegalsa-Eroski, e o Patrocinio Bronce de Salimat Abanca e do Hotel AC Palacio del Carmen, Clusaga celebrará ás 9.00 horas a súa Asemblea Xeral anual exclusiva para socios, á que é posible inscribirse no propio formulario de rexistro do evento.
Programa do Foro e Premios Galicia Alimentación
A xornada pública dará comezo a partir das 10.45 horas, momento no cal se recibirá aos asistentes coa primeira parte do Cóctel de Alimentos e Bebidas de Galicia. Este espazo networking, que volverá estar dispoñible a partir das 14.30 horas, cando finalice a gala, permitirá visitar, respectivamente, a Exposición de Alimentos e Bebidas Excelentes e Innovadores, e o Espazo de Demos “A Alimentación do Futuro”.
A continuación, ás 11.30 horas, arrancará o Foro, estruturado en dúas mesas redondas. Baixo o título “As novas fronteiras na innovación alimentaria”, abordará áreas emerxentes como son os novos alimentos alternativos, os alimentos funcionais, a nutrición personalizada ou o uso de tecnoloxía avanzada na produción, procesamento e envasado de alimentos, pasando por técnicas como a nanotecnoloxía, a enxeñaría xenética aplicada aos alimentos, a biotecnoloxía, ou a IA.
O panel de relatoras e relatores de 2024 o compoñen César Valencoso, de Kantar; Iván García, de Néboda Farms; Sofía Pérez, de Mundo Healthy; Rafael Urrialde, de la UCM; Vanesa Martínez, de Grupo Carinsa; Jose Miguel Multet, da UPV; Henrik Stamm, de Blendhub; Ignasi Papell, de Eurecat; e Ángeles Romero, da USC.
Ao remate do Foro, a Gala de entrega dos Premios Galicia Alimentación revelará as entidades ganadoras dos cinco premios desta X Edición: Produto Innovador, Produto Excelente, Estratexia de Marketing o Internacionalización, Iniciativa Innovadora e Iniciativa Sostible.
Para terminar, e como en edicións anteriores, as persoas asistentes poderán gozar da segunda parte do Cóctel de Alimentos e Bebidas de Galicia, conformado por produtos de entidades socias de Clusaga ou candidatas aos Premios. Durante a comida volverán a habilitarse tanto a Exposición de Alimentos e Bebidas Excelentes e Innovadores, e o Espazo de Demos “A Alimentación do Futuro”.
Tras isto, aquelas empresas que teñan manifestado o seu interese en manter reunións B2B con outras entidades aproveitando a celebración deste evento, poderán acceder ao espazo asignado para o desenvolvemento das súas respectivas axendas.
Inscrición e máis información
As persoas interesadas en asistir ou participar no Foro e Premios Galicia Alimentación 2024 deben rexistrarse a través do formulario que aparece a continuación. O prazo para facelo permanecerá aberto ata o 11 de xuño ás 14.00 horas.
Para máis información pode consultarse o programa completo ou contactar con Clusaga no correo comunicacion@clusaga.org ou no teléfono 981 556 062.
