O Clúster Alimentario de Galicia (Clusaga) organiza un webinar informativo de media hora de duración para presentar o seu novo Programa de Provedores Homologados, unha iniciativa que nace co propósito de reforzar a rede de colaboración entre as empresas socias do clúster e identificar provedores de confianza que acheguen solucións aliñadas coas necesidades do sector alimentario galego.
Un selo de confianza para dinamizar o ecosistema alimentario
Durante esta sesión virtual abordaranse os principais obxectivos do programa, os requisitos para formar parte del e as vantaxes que ofrece tanto para os provedores como para as empresas demandantes de servizos. A iniciativa está concibida como unha ferramenta estratéxica que promove a profesionalización do ecosistema alimentario a través da mellora continua, a confianza mutua e a excelencia na prestación de servizos.
Ademais, o programa actuará como un selo de confianza e calidade, deseñado para incrementar a visibilidade dos provedores adheridos, facilitar a súa integración na cadea de valor do sector e fomentar relacións estables e duradeiras que impulsen a competitividade de todos os axentes implicados.
O webinar está dirixido a empresas provedoras e potenciais colaboradoras, tanto socias como non socias de Clusaga, que desexen coñecer de primeira man o funcionamento do programa, os criterios de homologación e as diferentes modalidades de colaboración previstas.
Para máis información, podes contactar co equipo de Clusaga a través do correo electrónico bdm@clusaga.org ou chamando ao 881 023 853.
