O Clúster Alimentario de Galicia (Clusaga), organiza o vindeiro 24 de febreiro, ás 9.30 horas, o evento “Sustentabilidade no sector alimentario. Tecnoloxías para a redución do impacto ambiental, a eficiencia enerxética e o aproveitamento de subprodutos”.
O obxectivo deste encontro, que terá lugar no Edificio Feuga (Campus Vida, Santiago de Compostela), é mostrar casos de éxito de desenvolvemento e aplicación de novas tecnoloxías para a mellora ambiental na industria alimentaria, especialmente en relación coa redución do impacto ambiental (pegada hídrica e pegada de carbono), a eficiencia enerxética e o aproveitamento de subprodutos.
Para isto, nesta xornada presentaranse diferentes proxectos relacionados con estas temáticas. O evento estará dividido en tres mesas redondas tituladas “Novas tecnoloxías e procesos para a redución dos impactos ambientais”, “Eficiencia enerxética e enerxías renovables” e “Innovación para o aproveitamento de subprodutos”, respectivamente.
GT3 “Sustentabilidade, economía circular e bioeconomía” de Clusaga
Esta xornada organízase no marco do grupo de traballo 3 (GT3) “Sustentabilidade, economía circular e bioeconomía” de Clusaga, conxunto entre a Comisión de Innovación e I+D e a Comisión de Sustentabilidade.
O GT3 ten por obxectivo facilitar espazos de networking innovativo e xeración de ideas de colaboración entre os distintos axentes do ecosistema de innovación galego con intereses nestas temáticas.
