O Clúster Alimentario de Galicia organiza, co apoio do Instituto Galego de Promoción Económica (Igape), unha misión comercial inversa dirixida ao mercado xaponés, unha iniciativa estratéxica para impulsar a internacionalización das empresas galegas do sector alimentario.
Esta acción ten como obxectivo facilitar o contacto directo entre empresas galegas e importadores e distribuidores procedentes de Xapón, un mercado de alto valor e gran complexidade. A iniciativa permite establecer novas relacións comerciais, explorar canles de distribución específicos e comprender mellor as preferencias e estándares de calidade esixidos polo consumidor xaponés.
A misión estrutúrase en dúas modalidades para maximizar o impacto. A Modalidade A permite a celebración de reunións B2B individuais entre empresas galegas e compradores xaponeses, facilitando a negociación directa. A Modalidade B completa esta experiencia con visitas técnicas a fábricas de produción en Galicia, permitindo aos compradores xaponeses comprobar in situ os procesos produtivos, a tecnoloxía aplicada e os estándares de seguridade alimentaria, reforzando así a confianza na oferta galega.
Esta iniciativa enmárcase nas axudas para a execución de accións de promoción exterior conxunta das empresas galegas (Galicia Exporta Organismos Intermedios), cofinanciadas pola Unión Europea no marco do programa Galicia FEDER 2021–2027. O proxecto está promovido polo Clúster Alimentario de Galicia (Exp. IG421A.2025.000.000032).
