A MeixoEira, Queixería Barral, Dairy Pet, CEAMSA, Queizuar e Hijos de Rivera fanse cos X Premios Galicia Alimentación

• Ao acto, que tivo lugar na Cidade da Cultura de Galicia, asistiron a conselleira de Medio Rural, María José Gómez, e o conselleiro do Mar, Alfonso Villares

• A xunta directiva do Clúster decidiu, ademais, entregar un premio honorífico a Joaquín González, polos seus 25 anos como director de Vegalsa-Eroski e a súa traxectoria no sector

• O presidente de Clusaga, Andrés Rodríguez Gómez, felicitou aos galardoados, aos que cualificou como un auténtico motor “para que o sector da alimentación e as bebidas continúe sendo unha insignia dentro e fóra de Galicia”

A innovación, a sostibilidade, a competitividade e a excelencia no sector da alimentación e as bebidas volveron ser recoñecidos polo Clúster Alimentario de Galicia (Clusaga), a través dos Premios Galicia Alimentación. Coincidindo co décimo aniversario foron seis as empresas que recibiron, este ano, os galardóns de Clusaga: A MeixoEira, Queixería Barral, Dairy Pet, CEAMSA, Queizuar e Hijos de Rivera. A maiores, a xunta directiva do Clúster decidiu entregar tamén un premio honorífico, que recaeu nas mans de Joaquín González polos seus 25 anos como director de Vegalsa-Eroski.

A entrega dos premios foi o broche de ouro do Foro Galicia Alimentación, unha cita anual na que Clusaga reuniu a numerosos expertos e profesionais que falaron sobre o presente e o futuro deste sector. Nesta edición, Clusaga aproveitou o evento para lembrar a algúns dos referentes que contribuíron ao crecemento exponencial deste ámbito e que faleceron recentemente: o fundador de Bonilla a la vista, César Bonilla; o creador de Congalsa, Luis Simarro; e a cofundadora de Lence, María del Carmen Ferreiro.

A conselleira de Medio Rural, María José Gómez, foi a encargada de pechar os Premios Galicia Alimentación cun discurso no que enxalzou a importancia do sector en Galicia. Á cita asistiron, así mesmo, o conselleiro do Mar, Alfonso Villares, a directora xeral do Instituto Galego de Promoción Económica (IGAPE), Covadonga Toca, e a directora-xerente de Galicia Calidade, Ana Méndez, entre outros.

Por segundo ano consecutivo, o Clúster volveu bater un récord de candidaturas, pasando das 99 acadadas no 2023 ás 130 desta décima edición. Isto é, produciuse unha suba de máis do 30% entre ambas convocatorias. Por premios, o máis demandado foi o de Produto Excelente (54 en total), seguido polo de Produto Innovador (35).

Tras a deliberación do xurado, a relación de galardoados é a que, a continuación, se indica:

1. Premio Galicia Alimentación ao Produto Innovador. Búscase recoñecer aos produtos caracterizados pola innovación, capacidade para adaptarse ás demandas do consumidor ou valor engadido polo uso de materias primas galegas. Tendo isto en consideración, resultou gañador:

• A Meixoeira, polo seu Queixo Fresco para untar de cabra. Está elaborado con leite de cabra de elaboración propia cunha premaduración do leite a temperatura controlada de 24 horas, o que o converte nun produto diferente e diferenciado no mercado. O produto ten, ademais, o selo de calidade Artesanía Alimentaria.

2. Premio Galicia Alimentación ao Produto Excelente. Co galardón preténdese enxalzar aos produtos que incorporan valores tradicionais do sector de Galicia adaptándoos, iso si, ao contexto actual, ben a través do deseño ou ben empregando materias primas locais. Nesta décima edición foi para:

• Queixería Barral polo seu Queixo de Trufa e Boletus. O produto fusiona a riqueza terrosa das trufas coa suavidade e a cremosidade do queixo Barral. É único no mercado, xa que todos os queixos con trufa adoitan ser de pasta dura, o que se contrapón coa cremosidade do da Queixería Barral.

3. Premio Galicia Alimentación á Estratexia de Márketing ou Internacionalización. Un galardón ao esforzo de empresas por acceder, desenvolver e consolidar a súa posición no mercado nacional e internacional. Tras valorarse o plan de márketing no posicionamento en nichos de mercado, a orientación ao consumidor e a implantación de campañas, outorgouse a:

• Dairy Pet polo seu posicionamento en mercados nacionais e internacionais. A firma está presente en máis de 22 países, ofrecendo unha gama completa de iogures e xeados para cans e gatos, cunha fórmula desenvoldida, especificamente, para as mascotas e en envases fáciles de usar.

4. Premio Galicia Alimentación á Iniciativa Innovadora. Un recoñecemento aos produtos que se caracterizan pola súa innovación, potencial comercial ou deseño e pola a súa adaptación ás demandas do consumidor ou que achegan valor ás materias primas galegas, con especial atención á relación entre nutrición e saúde.

• CEAMSA, pola súa aposta pola innovación, o que os converte nun referente en I+D+i nos sectores biotecnolóxico e agroalimentario. Foron os primeiros produtores nacionais de hidrocoloides naturais a partir de algas. A súa esencia como empresa baséase na sostibilidade, na calidade e na economía circular.

5. Premio Galicia Alimentación á Iniciativa Sostible. Trátase dun galardón novo co que o Clúster pretende recoñecer aquelas prácticas e empresas caracterizadas pola súa sostibilidade, tanto na organización e produción coma nos seus produtos e servizos. Tras a deliberación do xurado, entregouse ex aequo a dúas firmas:

• Queizuar, pola súa traxectoria sostible e innovadora. A firma logrou transformar lácteos nun medio de cultivo para producir microbiana de bioetanol. O tribunal puxo en valor, ademais, a innovación da compañía, que aproveitou a nata de soro para a produción de manteiga premium.
• Hijos de Rivera polo seu “No Pack”. Destacouse a súa aposta pola innovación orientada á sostibilidade, ao substituír o cartón dos packs por puntos de cola que serven de unión entre as latas. Grazas a este novo sistema, a firma conseguiu eliminar a embalaxe, reducindo considerablemente a súa pegada de carbono.

A maiores, a xunta directiva do Clúster Alimentario de Galicia decidiu entregar un último galardón, o Premio Honorífico de Galicia Alimentación. Nesta ocasión, o recoñecemento recaeu nas mans de Joaquín González pola súa traxectoria a prol do sector. González ocupou, durante 25 anos, o cargo de director na empresa Vegalsa-Eroski.

Foro Galicia Alimentación

Antes da entrega de premios celebrouse o Foro Galicia Alimentación 2024 baixo o título As novas fronteiras na innovación alimentaria, a través do cal varios expertos abordaron cuestións como a innovación na produción, o desenvolvemento de alimentos saudables e as tecnoloxías emerxentes.

Na primeira mesa redonda, Da granxa á mesa: innovación na produción e desenvolvemento de alimentos saudables, tomaron a palabra os seguintes relatores: o consumer insights director de Kantar, César Valencoso; o CEO e cofundador de Néboda Farms, Iván García; a directora de negocio e crecemento de Mundo Healthy, Sofía Pérez; e o experto en seguridade alimentaria e nutrición e profesor asociado da Universidade Complutense de Madrid, Rafael Urrialde. Pola súa banda, o CEO de Quescrem, Sergio Alonso, foi o encargado de moderar o debate.

O último relatorio levou o título de Tecnoloxías emerxentes nas fronteiras do coñecemento, e contou coa participación de: a CEO de Grupo Carinsa, Vanesa Martínez; o catedrático de Biotecnoloxía na Universitat Politècnica de València, José Miguel Mulet; o fundador e CEO de Blendhub, Henrik Stamm Kristensen; e o responsable de proxectos singulares de alimentación en Food Eurecat, Ignasi Papell. A catedrática de Tecnoloxía dos Alimentos da Universidade de Santiago de Compostela, Ángeles Romero, foi a moderadora.

Cóctel de Alimentos e Bebidas de Galicia

Ao remate do Foro e os Premios Galicia Alimentación realizouse un cóctel no que o público asistente tivo a ocasión de degustar algúns dos produtos que se presentaron aos galardóns de Clusaga, así como de entidades socias do Clúster.

Os alí presentes puideron catar produtos das seguintes categorías e marcas: Conservas Friscos, Mieles Anta, Torre de Núñez, Queizuar, Celtagal, Perusiñas, Acastrexa, La empanada viajera, Licores Os Maios, Congalsa, Calabizo, Cafés Lúa, Maremonte Setas, Hijos de Rivera, Restaurante Miguel González, Larsa, Ecocentro, Grupo Lence, Viña Costeira, Casa Grande de Xanceda, Porto-Muíños, Central Lechera Gallega, Bodegas Martín Códax, Quescrem, Queixería Barral, Agro de Bazán, Hermanos Paniagua, Gadisa, Cafés Candelas, Daveiga, Jamones González, Vanetta Food, Minimelis, Aceites Abril, Vegalsa-Eroski, Jealsa, Clesa, Clavo Food Factory, Pereira Productos del Mar, Ternera Gallega, Galician Brew, CienPorCel, Bico de Xeado, Campomayor, Grupo Frinsa e Bonilla a la vista.

Ademais, un ano máis, a gala contou co apoio institucional da Xunta de Galicia, co patrocinio ouro de Caixa Rural Galega, Gadisa e Vegalsa Eroski e o bronce de Salimat Abanca.