- O Clúster Alimentario de Galicia e San Telmo Business School inauguran en Santiago de Compostela o Programa de Dirección de Empresas Alimentarias (DEA), que regresa a Galicia tras unha década de ausencia.
- A formación reúne a 47 directivos e profesionais do sector alimentario galego e se desenvolverá en 17 xornadas en Santiago de Compostela.
- O programa conta co apoio financeiro da Xunta de Galicia a través da Consellería do Mar, reforzando o compromiso coa capacitación e competitividade do sector.
Galicia dá un novo paso cara á capacitación do sector alimentario galego co inicio do Programa de Dirección de Empresas Alimentarias (DEA), un programa formativo de alto nivel promovido polo Clúster Alimentario de Galicia (Clusaga) e San Telmo Business School. A formación, que regresa á comunidade tras case unha década de ausencia, deu comezo hoxe no Hotel Puerta del Camino, en Santiago de Compostela, reunindo a 47 directivos e profesionais do sector. Financiado pola Xunta de Galicia a través da Consellería do Mar, o DEA busca dotar aos participantes das competencias necesarias para afrontar os desafíos dun sector en constante evolución.
A xornada inaugural contou coas intervencións de Andrés Rodríguez, presidente de Clusaga, Rocío López, membro do comité de dirección de San Telmo, Alfonso Villares, Conselleiro do Mar e coa presenza de Patricia García, directora xeral de Pesca, Acuicultura e Innovación Tecnolóxica.
Compromiso coa formación e o desenvolvemento do talento
No inicio do acto institucional, Andrés Rodríguez remarcou que iniciativas como o DEA responden aos obxectivos definidos no Plan Estratéxico 2021-2025 de Clusaga, e adiantou que a organización continuará apostando pola capacitación do sector no novo plan estratéxico que se está a elaborar. Rocío López, en representación de San Telmo Business School, subliñou a vontade da institución de reforzar a súa presenza en Galicia: “Non queremos agardar outra década para volver. O noso compromiso é seguir impulsando máis plans formativos para o sector alimentario galego”.
O acto concluíu coa intervención do Conselleiro do Mar, Alfonso Villares, quen destacou a importancia desta formación para o crecemento do sector: “Desde a consellería estamos moi orgullosos desta colaboración entre Clusaga e San Telmo. Este tipo de capacitación é importante non só para reforzar o currículo, senón para dar resposta aos cambios no mercado”. O conselleiro afirmou que Galicia representa un mercado clave dentro e fóra das súas fronteiras, remarcando que a capacitación integral é clave para seguir traballando pola viabilidade e sustentabilidade da industria do mar.
Formación para afrontar os retos do mercado
O Programa DEA ten como obxectivo dotar os directivos do sector alimentario de coñecementos estratéxicos e prácticos para afrontar os novos retos do mercado. Ao longo das 17 xornadas de formación, os participantes adquirirán competencias en áreas como a xestión estratéxica, liderado, innovación, finanzas e transformación dixital, abordando os principais desafíos do sector. Ademais, o enfoque práctico do programa permitiralles aplicar os coñecementos adquiridos directamente nas súas empresas.
San Telmo Business School, coa súa ampla traxectoria na formación empresarial, posiciónase como un socio clave para garantir o éxito deste programa. Con este arranque, o Clúster Alimentario de Galicia reafirma o seu compromiso co desenvolvemento do talento e a excelencia na dirección empresarial, consolidando a Galicia como un referente no sector alimentario.
