Clusaga impulsa a transformación dixital da industria da panadaría para mellorar os seus procesos e a calidade dos seus produtos
O Clúster Alimentario de Galicia (Clusaga) lidera xunto á Asociación de la Industria Alimentaria de Castilla y León (Vitartis) o proxecto ‘Photonics4Bakery’, cuxo propósito é impulsar a transformación dixital da industria da panadaría mediante a incorporación das tecnoloxías fotónicas para a mellora dos seus procesos e a supervisión da calidade do produto.
Trátase dun subsector de actividade que conta en Galicia con aproximadamente 1.250 empresas —case a metade das que operan no sector alimentario—, que xeran un volume de negocio de 400 millóns de euros, e dan emprego a máis de 8.000 persoas. Máis do 99% das empresas son micropemes.
Consorcio do proxecto
Tres empresas panadeiras galegas socias de Clusaga, Hornos de Lamastelle, Lugar da Veiga e Sanbrandán, colaborarán coas empresas tecnolóxicas socias do proxecto, AOTECH (Bilbao) e ATRIA Innovation (Zaragoza), que aportarán solucións concretas. Polo momento, visitaronas para coñecer os seus procesos de produción e avaliar a aplicabilidade en términos de eficiencia e eficacia das tecnoloxías fotónicas: NIR (Near InfraRed spectroscopy) e HSI (HiperSpectral Imaging).
En concreto, Clusaga lidera e coordina o proxecto ‘Photonics4Bakery’, e co apoio de Vitartis ten o obxectivo común de que as tecnoloxías aplicadas sexan coñecidas e poidan transferirse a todo o sector no Noroeste de España.
Sobre Photonics4Bakery
O proxecto busca avanzar na implementación de técnicas de machine learning e sistemas de procesado computacional intensivo. Trátase de desenvolver novas ferramentas que, sen necesidade de tomar mostra de produto, ofrezan datos clave que adoitan medirse nas industrias do sector para determinar tanto a calidade da fariña, como de produtos intermedios e finais na industria do pan e derivados. Ademais, analizaranse os mecanismos que permitan habilitar a súa implantación efectiva nos procesos industriais promovendo a transformación dixital das empresas e reducindo os sus custos actuais.
A iniciativa, apoiada pola convocatoria de apoio a AEIs do Ministerio de Industria, Comercio e Turismo e financiada pola Unión Europea a través dos fondos Next Generation, arrancou a finais de 2021 e terminará en agosto deste ano.
