Clusaga reúne nun Demo Day o potencial innovador das pemes alimentarias galegas con doce proxectos apoiados polo Igape

• O Demo Day reuniu en Santiago de Compostela a empresas socias de Clusaga que presentaron 12 proxectos de innovación no sector alimentario galego apoiados polo Ipape.

• Cinco destas iniciativas foron beneficiarias das convocatorias Deseñapeme e Innovapeme 2024, orientadas a impulsar a competitividade das pemes mediante o deseño e a innovación.

• Hermanos Paniagua, Torre de Núñez, Dairy Pet, Embutidos Montepicato e Airas Moniz presentaron os seus proxectos nunha xornada que reuniu a 50 asistentes.

O Clúster Alimentario de Galicia (Clusaga) celebrou o pasado 25 de setembro o Demo Day titulado “Do reto ao impacto: transformando o sector alimentario en Galicia a través da innovación”, un encontro no que acudiron 50 asistentes e onde se presentaron doce proxectos de innovación de empresas do ecosistema alimentario galego que contan co apoio do Instituto Galego de Promoción Económica (Igape).

Durante a xornada, cinco empresas presentaron os seus avances na innovación a través das convocatorias DeseñaPeme e InnovaPeme 2024, tanto na creación de novos produtos que responden a demandas emerxentes do mercado, como na modernización de procesos e organización, fortalecendo a capacidade das empresas para innovar de forma sostible e competitiva.

Proxectos innovadores apoiados por Deseñapeme e Innovapeme 2024

No marco das convocatorias Deseñapeme e Innovapeme 2024, orientadas a impulsar a competitividade das pemes galegas mediante o deseño e a innovación, cinco empresas do sector alimentario presentaron proxectos que destacan pola súa capacidade de responder a novas demandas do mercado, modernizar procesos e fortalecer a súa competitividade de forma sostible.

Hermanos Paniagua: ecodeseño e ingredientes de proximidade

A firma Hermanos Paniagua traballou en novas formulacións con ingredientes locais e procesos de destilación a baixa temperatura. A compañía incorporou o ecodeseño na fase de preindustrialización, con prototipos de botella e marca validados en grupos de consumo antes do lanzamento.

O envase e o etiquetado foron pezas clave do proceso: un packaging con maior contido de vidro reciclado que contribúe á mellora da loxística, protexe fronte á humidade e cun deseño máis atractivo para o consumidor. Con esta aposta, Hermanos Paniagua busca reforzar a súa posición no mercado internacional de produtos premium e avanzar no seu compromiso coa sustentabilidade.

Torre de Núñez: cárnicos máis saudables sen perder tradición

A empresa lucense Torre de Núñez presentou na xornada o seu proxecto de desenvolvemento dunha nova liña de produtos cárnicos máis saudables, con menor contido en graxa e un cun packaging optimizado.

O principal reto foi preservar a textura e as características organolépticas dos embutidos tradicionais. Para iso, a compañía desenvolveu probas piloto con potenciais clientes que avalían a viabilidade do lanzamento. O proxecto procura tamén optimizar o uso de materias primas, abrir novas oportunidades de mercado dentro e fóra de España e xerar emprego, nunha iniciativa aliñada coa RIS3 Galicia.

Dairy Pet: nutrición funcional para mascotas

A empresa Dairy Pet (YowUp!), con presenza en 34 países presentou dúas innovacións no marco de Deseñapeme: a introdución de L.casei para cans e gatos, con probióticos resistentes á pasteurización que reforzan o sistema inmunitario dos animais, e unha nova liña de leites funcionais adaptados ás necesidades específicas de cada especie.

Pensada especialmente para cans de idade avanzada, a fórmula favorece a saúde ósea e articular, mentres que en gatos está orientada á hidratación e foi enriquecida con taurina. Produtos de longa vida útil a temperatura ambiente que reforzan a estratexia internacional da compañía nun mercado global en crecemento.

Embutidos Montepicato: carnes de razas autóctonas para o canal HORECA

A empresa familiar Embutidos Montepicato deu a coñecer o desenvolvemento dunha gama de nove produtos cárnicos elaborados con razas autóctonas galegas, dirixidos principalmente ao canal HORECA. A compañía apostou desde o inicio por colaborar con produtores locais para garantizar a orixe dos seus produtos, e o packaging desenvolvido achega tamén un valor diferencial.

A gama inclúe referencias como codillo asado, pastrami de vacún, guanciale de porco celta ou pepperoni, todas elaboradas con graxas naturais e cunha clara orientación á calidade.

Airas Moniz: unha folla de ruta para a I+D+i

A cooperativa Airas Moniz desenvolveu o seu proxecto Innovapeme coa creación dunha estratexia estruturada de I+D+i. O plan incluíu a definición dun departamento propio, acompañado dunha folla de ruta baseada nunha análise

Con apoio de Clusaga, realizáronse estudos de mercado que identificaron tendencias de consumo, motivacións de compra e oportunidades competitivas. Ademais, avaliáronse alternativas tecnolóxicas e de procesos, deseñouse de forma preliminar unha nova planta e elaborouse un mapa de axudas e incentivos fiscais para facilitar a implantación de futuros proxectos.

Intelixencia Artificial para transformar o sector

No marco da convocatoria IG408M – IA360 do Igape no marco do Plan de Recuperación, Transformación e Resiliencia, financiado pola Unión Europea-NextGenerationEU, presentáronse tres proxectos que mostran como a intelixencia artificial pode impulsar a innovación e mellorar a competitividade no sector alimentario galego:

• NeuroCall360: unha aplicación para a xestión de alarmas en centros de control que incorpora IA para reducir falsos positivos e optimizar a atención ao cliente. A solución unifica incidencias repetitivas mediante parámetros dinámicos que se axustan segundo o historial de cada alarma, reducindo a carga de traballo e aumentando a eficiencia operativa.
• PremIA: sistema predictivo para a produción de produtos do mar, deseñado para mellorar a eficiencia industrial e reducir o desperdicio alimentario. Utiliza modelos de machine learning e deep learning para optimizar formulacións de surimi, prever a vida útil do langostino cocido e tomar decisións en tempo real que melloran a calidade e sustentabilidade do produto.
• Alphachick: proxecto innovador no sector avícola que combina IA e tecnoloxía NIR para mellorar a alimentación, o benestar animal e a eficiencia produtiva. O sistema analiza datos de sensores e condicións ambientais en tempo real, permitindo predicións e recomendacións precisas que preparan a solución para a súa implantación en granxas comerciais e a transición a un nivel comercial completo

Innovación con impacto

Estes proxectos apoiados polo Igape foron só unha parte das 12 iniciativas totais que se presentaron no Demo Day. Ademais, oito provedores socios de Clusaga aproveitaron a xornada para ofrecer os seus pitches, conectando directamente coas empresas e reforzando a transferencia de coñecemento no sector.

Grazas ao servizo INNPULSA Clusaga participou activamente nestes proxectos, consolidándose como motor da innovación e acompañando ás empresas socias no desenvolvemento de solucións sostibles, competitivas e adaptadas ás demandas do mercado.