Clusaga, seleccionado na convocatoria “Cara a unha transición verde” da European Cluster Collaboration Platform
O Clúster Alimentario de Galicia (Clusaga) foi seleccionado na iniciativa “Cara a unha transición verde” da European Cluster Collaboration Platform (ECCP) financiada pola Comisión Europea, que ten como obxectivo promover habilidades e coñecementos cara a unha economía verde.
A través desta iniciativa, Clusaga accederá a formación e asesoramento sobre oportunidades, ferramentas e tecnoloxías de transición verde para axudar aos seus socios, especialmente ás pemes galegas, a adoptar prácticas de xestión sustentable en toda a cadea de valor, así como a atopar posibles proxectos ou actuacións de colaboración.
Entre os servizos que ofrece esta iniciativa, ademais da formación, atópanse documentos de orientación, talleres e seminarios web, que capacitarán a Clusaga para poder guiar e acompañar ás empresas asociadas na súa transición verde e plan de economía circular.
Pola súa banda, modelos de negocio resilientes, investimentos sustentables, eficiencia enerxética, xestión de residuos, economía circular e innovación sustentable son algúns dos temas que se abordarán nestas actividades de asesoramento de mecanismo de asistencia técnica, que terán unha duración máxima de cinco meses e serán levadas a cabo por parte de asesores expertos na materia.
En total, foron 25 os clústeres europeos seleccionados, dun total de 70 candidaturas, nesta convocatoria “Cara a unha transición verde” da ECCP.
Esta iniciativa supón un paso máis nas accións do eixo 2 “Capital humano, emprendimiento, sustentabilidade e avance cara á fábrica do futuro” do Plan Estratéxico de Clusaga e un impulso para a Comisión de Sustentabilidade e Economía Circular integrada por máis de 15 entidades socias.
