- O obxectivo de IMPRESS é co-crear, subministrar e promover novos produtos e procesos mellorados a partir de especies mariñas e de auga doce de baixo nivel trófico.
- Clusaga contribuíu ao proxecto con diferentes informes que permitiron o avance do proxecto.
- IMPRESS é un proxecto europeo cofinanciado polo programa Horizonte Europa, en curso desde maio de 2023 ata abril de 2027.
Nos últimos 18 meses, o proxecto IMPRESS, no que participan Clusaga e ANFACO-CECOPESCA, logrou avances significativos na súa misión de impulsar a sustentabilidade sectorial e o crecemento azul. O proxecto centra os seus esforzos en desenvolver solucións innovadoras utilizando especies de baixo nivel trófico (LTS, polas súas siglas en inglés) e fluxos de residuos, co obxectivo de crear produtos de valor engadido e fomentar prácticas ecolóxicas. Entre os seus principais logros destacan a investigación exhaustiva, a implicación das partes interesadas de toda a cadea de valor e o piloto de tecnoloxías novidosas. Ademais, IMPRESS fortaleceu a súa presenza dixital a través de redes sociais, blogs, vídeos interactivos e o lanzamento dunha serie de podcasts.
Contribucións destacadas de Clusaga ao proxecto IMPRESS
Clusaga desempeñou un papel relevante no proxecto, especialmente en relación co vínculo co mercado e a industria.
Identificación de produtos e actores clave do sector
Clusaga elaborou o informe “Products and business stakeholders” centrado na identificación e descrición de produtos existentes a partir de especies de baixo nivel trófico, así como na identificación das principais partes interesadas (tanto empresas como investigadores) que traballan con este tipo de especies. Este informe serve de guía ao proxecto IMPRESS para desenvolver produtos novos ou mellorados aproveitando a información sobre o mercado. A metodoloxía empregada consistiu na utilización de bases de datos internacionais como InnovaMarket Insights para recompilar datos de mercado relevantes, centrándose en produtos, estratexias e tendencias de mercado globais. O informe esboza varios produtos comercializados baseados en LTS, incluídos ingredientes alimentarios, suplementos dietéticos e pensos para animais, xunto cunha lista detallada das partes interesadas do mundo empresarial e da investigación que participan no sector das especies mariñas e de auga doce de baixo nivel trófico.
Análise dos subprodutos da industria pesqueira
Clusaga tamén realizou un informe centrado na identificación e cuantificación de subprodutos de peixe xerados nos sectores da transformación, a venda polo miúdo e HORECA. Realizouse unha serie de cuestionarios a empresas de España, Francia, Irlanda e outros países europeos a nivel micro (empresas, pescadores, restaurantes) e meso (asociacións sectoriais) sobre a cantidade, vendas, temporalidade, manexo e oportunidades do uso de subprodutos mariños. A información extraída dos cuestionarios complementouse con información proveniente de bases de datos públicas. Identificáronse retos como os custos de investimento elevados e as dificultades para a revalorización destes produtos, as barreiras normativas e loxísticas, a necesidade de investir en I+D para crear novas tecnoloxías de procesado, a creación e expansión de mercados para subprodutos novidosos coa axuda de marketing e educación aos consumidores e o efecto destes subprodutos non aproveitados a nivel ambiental.
Outras actividades do proxecto IMPRESS
Procesos innovadores e ingredientes novidosos para a redución de residuos e a sustentabilidade da pesca e a acuicultura
No proxecto IMPRESS elaborouse tamén un informe no que se detallaron os fluxos de residuos sólidos e líquidos, as tecnoloxías de procesamento e os parámetros para a recuperación de quitina, quitosano, lípidos e proteínas.
Os principais residuos analizados foron:
- Carapachos de crustáceos (para obter quitina e quitosano)
- Subprodutos do fileteado de peixe (cabezas, espiñas e vísceras para obter proteínas e lípidos)
- Augas residuais do procesado de peixe e marisco.
Para a súa valorización utilízanse técnicas como a ultrasonicación, a alta presión, os tratamentos encimáticos, a precipitación termoquímica, a ultrafiltración e a extracción con disolventes verdes. Os prometedores resultados experimentais mostran unha recuperación eficaz de compostos e unha redución do consumo enerxético, con compostos específicos caracterizados para aplicacións a medida. Serve de trampolín para ampliar os procesos e avaliar a súa viabilidade industrial, contribuíndo así a unha industria marisqueira máis sustentable.
Este traballo complementouse con dúas publicacións elaboradas por NEOALGAE (empresa socia de IMPRESS). Pode atopar máis información aquí e neste enlace.
