Nace Net4food, a rede de excelencia alimentaria na Eurorrexión Galicia-Norte de Portugal na que participa Clusaga
-
Net4food é un proxecto europeo financiado por Interreg POCTEP cuxo consorcio, coordinado polo Instituto Politécnico de Bragança, integran Clusaga, UVigo, INL, PortugalFoods, MORE e Aqua Valor
-
O obxectivo de Net4food é crear unha rede de excelencia alimentaria en innovación e sustentabilidade, ademais dun laboratorio de referencia internacional no sector da UE
-
O proxecto foi presentado onte nun acto público celebrado no Edificio Xurídico-Empresarial do Campus de Ourense
Ourense acolleu na mañá do xoves a presentación de Net4food, un proxecto de colaboración internacional que busca establecer unha rede de excelencia alimentaria na Eurorrexión Galicia-Norte de Portugal, promovendo a innovación e sustentabilidade no sector. A rede está aliñada, ademais, coa creación do Iberian FoodTec Lab, un laboratorio de referencia internacional no sector alimentario na Unión Europea.
Esta iniciativa está financiada por Interreg POCTEP, e será implementada por un consorcio que, coordinado polo Instituto Politécnico de Bragança, reúne ao Clúster Alimentario de Galicia (Clusaga), á Universidade de Vigo (UVigo), o Laboratorio Ibérico Internacional de Nanotecnología (INL), o clúster PortugalFoods, e os laboratorios colaborativos MORE e Aqua Valor.
Principais obxectivos e liñas de actuación
Os obxectivos de Net4food inclúen fortalecer a capacidade científica e innovadora no sector da alimentación, aliñar retos de investigación cunha Axenda de Innovación e Investigación e promover a transferencia de coñecemento ao mercado mediante Bancos de Innovación Aberta e Bancos de Boas Prácticas, entre outros.
Para lograr o seu cometido, o consorcio do proxecto levará a cabo diversas actividades, como analizar e sistematizar o coñecemento innovador, establecer unha estrutura sólida de funcionamento para a rede que asegure a súa continuidade, facilitar a interconexión entre os axentes de I+D+i do sector alimentario, ou impulsar a interacción entre o ecosistema investigador e empresarial.
Acto de presentación
Durante a xornada do xoves, tras a benvida institucional a cargo de Orlando Rodrigues, presidente do Instituto Politécnico de Bragança; Manuel Joaquín Reigosa, reitor da UVigo; e Isabel Ferreira secretaria de Estado del Desarrollo Regional de Portugal, os socios do consorcio de Net4Food explicaron en detalle os obxectivos e actividades previstas para a execución do proxecto.
A continuación, o evento incluíu unha mesa redonda que permitiu abordar tendencias sostibles na industria alimentaria, como os ingredientes naturais ou a tecnoloxía alimentaria e o seu impacto na saúde. Nela interviron representantes das empresas Landratech, Pão de Gimonde, O Rexo e Viña Costeira xunto a investigadores de INL, UVigo e CoLab MORE.
Para rematar, as persoas asistentes ao encontro visitaron as instalacións da nova planta piloto dirixida ao sector alimentario da UVigo no Campus de Ourense, e tiveron a oportunidade de explorar oportunidades de colaboración.
