O Clúster Alimentario de Galicia lanza FoodTalent.gal, o portal de emprego exclusivo para o sector alimentario galego

• FoodTalent.gal é unha iniciativa do Clúster Alimentario de Galicia (Clusaga), desenvolvida en colaboración con Jobfie, para mellorar a conexión entre profesionais e empresas do sector alimentario galego.
• A plataforma foi presentada no stand virtual do Talentia Summit , onde se explicou o seu funcionamento a persoas en busca de emprego e se lles axudou a crear e optimizar os seus perfís.
• FoodTalent.gal ofrece unha solución innovadora que combina tecnoloxía de intelixencia artificial e ferramentas personalizadas para mellorar a empregabilidade e facilitar os procesos de selección no sector alimentario galego.

O Clúster Alimentario de Galicia (Clusaga) lanzou FoodTalent.gal, o primeiro portal de emprego especializado no sector alimentario galego e adaptado ás necesidades das empresas alimentarias de Galicia. A plataforma, accesible a través de www.foodtalent.gal, ofrece ás empresas socias unha ferramenta clave para a captación de talento e aos profesionais do sector unha bolsa de emprego actualizada e adaptada ás esixencias do mercado laboral.

Un novo ecosistema de talento para Galicia

FoodTalent.gal presenta unha nova ferramenta estratéxica que permite a conexión entre talento e empresas no sector alimentario galego. A través desta iniciativa, Clusaga busca reforzar a competitividade do sector, impulsando novas oportunidades de negocio e promovendo os valores de colaboración e innovación, que son fundamentais na súa acción.

Desta maneira, o portal contribúe á visión de Clusaga de posicionar a industria alimentaria galega como un referente global, xerando un impacto positivo na sociedade e consolidando o seu liderado no mercado internacional.

Tecnoloxía e innovación para mellorar a empregabilidade

A nova plataforma de emprego foi desenvolvida en colaboración con Jobfie, empresa especializada en solucións de recursos humanos e na creación de microportais de emprego para asociacións empresariais e institucións públicas. Esta alianza deu como resultado unha plataforma que destaca polo seu enfoque innovador e as súas ferramentas baseadas en Intelixencia Artificial. que melloran os procesos de selección. Os usuarios poden acceder a ofertas exclusivas do sector e mellorar a súa empregabilidade mediante ferramentas como un xerador de currículos asistido por IA e unha proba de autoavaliación de competencias que axuda aos candidatos a descubrir as súas fortalezas en relación ás 20 competencias máis demandadas polas empresas.

Deseñado para evolucionar de forma continua, o portal seguirá adaptándose ás demandas do mercado laboral e ás necesidades das empresas alimentarias. A súa flexibilidade permite melloras constantes baseadas nas suxestións dos usuarios e nos cambios no panorama laboral.

Presentación no Talentia Summit

FoodTalent.gal foi presentado no stand virtual do Talentia Summit, un evento promovido polo Concello de Santiago de Compostela, onde a plataforma foi moi ben recibida entre as persoas en busca de emprego. Durante os días 13 e 14 de novembro, o equipo de Clusaga explicou as funcionalidades de FoodTalent.gal a través de entrevistas personalizadas, comprendendo as necesidades de cada candidato e ofrecéndolles pautas para subir o seu perfil á plataforma, optimizando así as súas posibilidades de ser atopados polas empresas do sector alimentario galego.