O Agrifood Forum 2023, celebrado en Vilna o pasado 14 de novembro, acolleu o primeiro evento transrrexional do proxecto europeo HIGHFIVE, no que participa o Clúster Alimentario de Galicia (Clusaga), entre outras iniciativas relacionadas coa sustentabilidade e competitividade dos sistemas alimentarios.
O evento foi un excelente foro para salientar as oportunidades que HIGHFIVE ofrece para a transición verde e dixital das empresas: innovacións, oportunidades de colaboración ou actividades formativas, ademais das convocatorias de financiamento para proxectos de innovación do sector alimentario.
De feito, no Agrifood Forum 2023 anunciáronse os resultados da primeira destas convocatorias de HIGHFIVE, que recibiu 58 candidaturas. Das propostas presentadas, o consorcio do proxecto vén de seleccionar a 9 delas para recibir financiación. Entre os proxectos elixidos, que serán anunciados nos vindeiros días na páxina de LinkedIn do proxecto, hai dous de empresas galegas.
Alén do Foro, a axenda do consorcio do proxecto HIGHFIVE continuou o 15 de novembro cunha reunión para planificar as actividades dos próximos meses. Entre elas salientan a segunda convocatoria de proxectos de innovación, que abrirá o 15 de xaneiro de 2024, e o próximo evento transrrexional, que terá lugar en Anuga FoodTec 2024.
HIGHFIVE é un proxecto europeo que busca mellorar o crecemento e transición verde e dixital da industria de procesado de alimentos a través de investimentos interrexionais en innovación. Clusaga e a súa entidade asociada ITG son socias do consorcio. Para máis información sobre o proxecto pódese contactar co Punto Rexional de Contacto de HIGHFIVE para Galicia, Noelia Dosil, coordinadora da Área de Innovación, Transformación Dixital e Emprendemento de Clusaga.
