Case un cuarto dos proxectos de innovación apoiados por HIGHFIVE proceden de Galicia

• Clusaga forma parte do consorcio de HIGHFIVE, unha iniciativa que pretende impulsar a transición dual de pemes alimentarias europeas

• O 23% das iniciativas apoiadas por HIGHFIVE nas súas dúas convocatorias de fondos cascada proceden de Galicia, recaendo na Comunidade o 14,5% dos fondos que esta iniciativa europea dirixe a impulsar proxectos empresariais de innovación

• Tech4RedWines, Smartz4Can e Mayo-Q, as propostas seleccionadas nesta segunda convocatoria, involucran a 4 organizacións socias de Clusaga, que se suman ás outras 6 beneficiarias do proxecto

O Clúster Alimentario de Galicia (Clusaga), en liña co seu obxectivo de acompañar ás empresas na transición verde e dixital, participa no proxecto europeo HIGHFIVE, unha iniciativa que comparte esta meta e busca acadala a través de investimentos interrexionais en innovación. Neste contexto, a segunda convocatoria de fondos cascada de HIGHFIVE para apoiar iniciativas innovadoras deixou resultados moi positivos para Galicia.

Das 51 propostas presentadas, que involucran a 72 pemes alimentarias procedentes de 24 rexións europeas en 9 países diferentes, foron seleccionadas 7, das cales 3 corresponden a proxectos de empresas galegas. Trátase de Tech4RedWines, un sistema de fermentación sensorizado para viños tintos autóctonos, que será implementado por Bodegas Casa Montepío en colaboración con ANFACO-CECOPESCA; Smartz4Can, unha iniciativa para a dixitalización das pemes da industria conserveira de peixes e mariscos, na cal traballarán ASM Soft e Conservas Lago Paganini; e Mayo-Q, unha solución para a avaliación da calidade en tempo real da maionesa, a cargo de AOTECH Galicia e Cidacos.

Estas propostas súmanse a PREVAI, CREAMSENSE e BUPAIC, os tres proxectos galegos que xa foran seleccionados por HIGHFIVE. Deste xeito, o 23% das iniciativas seleccionadas e apoiadas polo proxecto europeo proceden de Galicia, o que supón que un total de 743.423 € de subvención – o 14,5% dos fondos que HIGHFIVE dirixe a proxectos empresariais- recaen na Comunidade.

Así, aos esforzos de Clusaga para promover a innovación, a transformación dixital e verde das empresas alimentarias galegas a través doutras convocatorias, coma a do PERTE Agroalimentario ou a das Agrupacións Empresariais Innovadoras do Ministerio de Industria e Turismo (MINTUR), súmase agora o éxito acadado no marco do proxecto HIGHFIVE.

Tecnoloxías de vangarda para a produtividade e sustentabilidade do sector alimentario

Os proxectos apoiados por HIGHFIVE incorporan varias tecnoloxías avanzadas, incluíndo intelixencia artificial (IA), sistemas de sensores e algoritmos preditivos. Case todos eles teñen como obxectivo mellorar a calidade dos alimentos e a eficiencia operativa.

Así, as 6 iniciativas galegas apoiadas no marco de HIGHFIVE reflicten a adopción continua da industria alimentaria de tecnoloxías punteiras e de smart data. Nomeadamente, no que respecta á calidade e seguridade alimentaria, varios proxectos destacaron melloras a través de sistemas de monitorización e control en tempo real da produción, e as solucións de IA, así como a toma de decisións impulsadas por datos, foron compoñentes significativos de moitos deles.

HIGHFIVE, un proxecto promovido pola Partnership Smart Sensors 4 Agrifood (SS4AF)

O proxecto HIGHFIVE “enHancing dIgital and Green growtH in the Food processing industry via Interregional innoVation invEstments” busca apoiar e facilitar a implementación de solucións dixitais en pemes de procesamento de alimentos, a través de investimentos interrexionais en innovación para acelerar a transición dual (dixital e verde) en Europa.

HIGHFIVE ten un orzamento de máis de 11 millóns de euros e conta co apoio do instrumento europeo Interregional Innovation Investments (I3). O consorcio de HIGHFIVE está coordinado polo clúster Flanders’ Food e inclúe máis de 30 socios, representando 39 rexións de 9 países europeos. Desde Galicia participan Clusaga e ITG.

Alén, cabe salientar que este proxecto foi promovido pola Asociación Temática de Especialización Intelixente Smart Sensors 4 Agrifood (SS4AF), na cal Clusaga ocupa a vicepresidencia.