O proxecto Hub4Food, coordinado por Clusaga, lanza 12 proxectos piloto de innovación alimentaria entre pemes e centros tecnolóxicos

O Clúster Alimentario de Galicia (Clusaga) coordina o proxecto europeo Hub4Food – Atlantic Food Innovation Hub, unha iniciativa que impulsa a innovación colaborativa entre pemes e centros tecnolóxicos do Espazo Atlántico. Neste marco, seleccionaron 12 proxectos piloto que se desenvolverán nos próximos meses co obxectivo de avanzar na formulación de alimentos máis innovadores, saudables e sostibles, mediante o uso de ingredientes de orixe mariña.

Estas iniciativas foron seleccionadas no marco dunha convocatoria aberta entre decembro de 2024 e febreiro de 2025, que recibiu 27 propostas de Francia, Irlanda, Portugal e España. Tras a avaliación delas, elixíronse os 12 proxectos con maior potencial de impacto, que serán implementados por centros tecnolóxicos participantes en Hub4Food: ANFACO-CYTMA, CATAA, LEMPA, MARE, PRAXENS e Teagasc.

Os proxectos piloto céntranse no desenvolvemento de alimentos máis saudables e sostibles mediante o uso de ingredientes mariños como algas, espirulina ou microalgas. As temáticas abordadas inclúen a mellora da saúde intestinal, alternativas veganas e sen glute, e solucións alimentarias funcionais.

Proxectos piloto galegos con participación de ANFACO-CYTMA

No caso de Galicia, destacan dúas iniciativas impulsadas por empresas alimentarias galegas:

• Porto-Muiños, co proxecto Bioseafiltration, que escalará tecnoloxías de ultrafiltración para a obtención de ingredientes alimentarios mariños bioactivos.
• Minimelis, cunha proposta de desenvolvemento de novas gominolas funcionais enriquecidas con ingredientes activos mariños.

Ambos os proxectos levaranse a cabo co apoio tecnolóxico de ANFACO-CYTMA, socio galego do consorcio Hub4Food.

Innovación colaborativa no Espazo Atlántico

O obxectivo destes proxectos é acelerar a transferencia de coñecemento e facilitar a colaboración entre empresas e centros tecnolóxicos no Espazo Atlántico. As solucións desenvolvidas, todas cun nivel de madurez tecnolóxica TRL6 ou superior, implementaranse durante os próximos 8 meses.

Ademais das iniciativas galegas, outros proxectos piloto seleccionados inclúen:

1. BREADALG – Premixes de panadería con algas para aplicacións saudables e sostibles en panificación (empresa MERISTEME)
2. Chouriça con contido reducido en sodio mediante el uso de salicornia (PRISCA ALIMENTAÇÃO SA)
3. Desenvolvemento de novos produtos utilizando algas mariñas locais para a elaboración de manteigas de mel con algas e xeles de musgo mariño (Mobia Foods)

• Desenvolvemento e testeo de mesturas innovadoras de fariñas sen glute, enriquecidas con fibra mariña para mellorar a saúde intestinal en persoas con enfermidade celíaca (Eonico Ltd)
• Edo Brown, ingrediente de espirulina decolorada (Edonia)
• O pan saudable de algas mariñas (Algolesko)
• Extensión da vida útil do salmón fresco mediante o uso de auga ozonizada (Omnifish)
• Zume vegano tipo carne elaborado a partir de espirulina (Edonia)
• Ingrediente funcional, listo para consumir, listo para impresionar (Companhia do Lucriz)
• Establecendo un novo estándar de ouro para unha mellor nutrición (Allmicroalgae)

Ao longo do proceso, os avances e resultados compartiranse a través das canles de comunicación de Hub4Food, co fin de dar visibilidade ao coñecemento xerado e promover a innovación no sector agroalimentario do Espazo Atlántico.