O consorcio do proxecto NEXADA, coordinado polo Clúster Alimentario de Galicia (Clusaga) e integrado polo Catalan Water Partnership (CWP) e a Asociación de Industrias de Conocimiento y Tecnología Aplicada de Euskadi (GAIA), presentou esta mañá os principais resultados desta iniciativa nun webinar.
Entre os logros de NEXADA destacan o desenvolvemento dun catálogo de tecnoloxías para a xestión eficiente da auga no sector alimentario e a identificación de retos xerais nos sectores lácteo, vitivinícola e mar-industria. Outro dos grandes fitos de NEXADA foron as ideas de proxectos de innovación xeradas no marco desta iniciativa.
En concreto, estas ideas de proxecto xestáronse nuns obradoiros para empresas alimentarias. As principais áreas de interese identificadas están relacionadas coa calidade da auga; o abastecemento sostible de acuíferos; a aplicación de tecnoloxía de ultrasons para limpeza de materiais, maquinaria ou solos; a monitorización dos caudais dos procesos; o tratamento eficiente e posible reutilización da auga residual xerada e o caderno de campo para explotacións agrícolas e gandeiras.
Ademais da presentación dos resultados de NEXADA, a cargo de representantes dos tres clústeres involucrados; o webinar serviu para dar a coñecer proxectos executados con éxito de pasadas convocatorias no nexo auga-dixital-alimentación: EDARi 4.0, presentado por Createch Solutions S.L.; DIGITGRAS 4.0, exposto por Disibeint Electronic S.L.; y o estudo de viabilidade para o desenvolvemento e utilización dun Xemelgo Dixital para o mantemento de infraestruturas de xestión do ciclo da auga presentado por GAIA.
NEXADA é un proxecto financiado no marco da convocatoria 2022B do programa de apoio a Agrupacións Empresariais Innovadoras (AEIs) que promove o Ministerio de Industria, Comercio e Turismo (MINCOTUR). Ademais, recibiu apoio do Fondo de Recuperación NextGenerationEU para a aceleración da transformación dixital.
O principal obxectivo desta iniciativa foi impulsar proxectos empresariais de I+D+i que exploten as sinerxias existentes no nexo auga-dixital-alimentación, para ofrecer solucións ao sector alimentario que impulsen o seu desenvolvemento sostible. En concreto, NEXADA centrouse nos subsectores lácteo, mar-industria e bebidas.