Real Conservera Española, Hijos de Rivera, Leche Río, Alibós, Quescrem, Gadis, Larsa e Pereira Productos del Mar fanse cos VIII Premios Galicia Alimentación

• Ao acto, que tivo lugar na Cidade da Cultura, asistiu o presidente da Xunta, ademais dos conselleiros do Medio Rural, do Mar, e o director do Igape

• O presidente de Clusaga, Juan José de la Cerda, felicitou aos galardoados, aos que calificou coma “grandes expoñentes e exemplos da riqueza e o talento do sector en Galicia”

A innovación e o compromiso co sector da alimentación foron recoñecidos, un ano máis, nos Premios Galicia Alimentación. O Clúster Alimentario de Galicia (Clusaga) distinguiu, esta mañá, estas dúas calidades, presentes nos proxectos galardoados na oitava edición. Nesta ocasión, as distincións recaeron en mans das seguintes compañías: Real Conservera Española, Hijos de Rivera, Grupo Leche Río, Alibós Galicia, Quescrem, Gadisa, Larsa e Pereira Productos del Mar.

A entrega dos Premios foi o broche de ouro do VII Foro Galicia Alimentación, cuxa inauguración correu a cargo do presidente de Clusaga, Juan José de la Cerda, e do presidente da Xunta de Galicia, Alfonso Rueda.

A entrega dos VIII Premios Galicia Alimentación 2022 contou coa presencia do conselleiro do Medio Rural, José González, da conselleira do Mar, Rosa Quintana, e do director do Instituto Galego de Promoción Económica, Fernando Guldrís.

Nesta oitava convocatoria, foron oito as compañías, proxectos e iniciativas que recibiron algún dos premios por parte do Clúster Alimentario de Galicia nas seguintes categorías: produto excelente, produto innovador, proxecto empresarial e estratexia de mercado.

A relación de galardoados é a que, a continuación, se especifica:

Produto excelente. A pesar de ser unha categoría de nova creación, foi a que máis candidaturas recibiu, alcanzando a cifra de 24.

• Real Conservera Española S.L. por Navallas das Rías Galegas ao natural. O xurado destacou que o produto elabórase cunha previa selección manual dos mellores exemplares que, directamente, se someten a un proceso de depuración natural en auga de mar para eliminar a area. As navallas enlátanse unha a unha, a man e con todo o cuidado que require este excelente producto. Recoñécese con todo isto un produto final excelente, con historia, carisma, artesanal e natural que ten a orixe na mellor materia prima e que é un embaixador da excelencia dos produtos galegos.

Produto innovador, que na presente edición conta con dúas premiadas ex aequo:

• Hijos de Rivera S.A.U por Fontarel Zero Sodio. Grazas á aplicación de tecnoloxía avanzada de ósmose inversa e a reconstitución da composición mineral orixinal da auga, eliminouse o sodio, obtendo un produto recoñecido pola Fundación Española do Corazón polo seu beneficio para a saúde.
• Grupo Leche Río S.L. por Optipro. O tribunal sinala que este produto está elaborado con leite ultrafiltrada con alto contido en proteína, baixo en grasas, sen azucres engadidos e sin lactosa. Estas bebidas de base láctea e hiperproteica están dirixidas a persoas que realicen algún tipo de deporte ou actividad física.

Proxecto empresarial, tamén con dúas compañías galardoadas ex aequo:

• Alibós Galicia, dedicada á produción, elaboración e comercialización da castaña pelada e ultraconxeada e derivados para a súa venda a industrias do mercado internacional. O xurado sinalou que a empresa incentiva o sector primario e repercute no consumidor, garantindo un produto ecolóxico, seguro e saudable.
• Quescrem pola súa planta de biogás basada en permeato, a primeira do seu tipo en España. Salienta a súa preocupación pola sustentabilidade medioambiental, buscando a incorporación de medidas que reduzan o consumo de recursos ao tempo que aminoran a xeración de residuos, potenciando a circularidade dos procesos.

Estratexia de mercado, con tres marcas galardoadas ex aequo:

• Gadisa Retail S.L.U. por Gadis, coa alimentación saudable. O tribunal reseñou que a marca emprega as súas redes sociais para levar a cabo diferentes accións para achegar un estilo de vida saudable aos seus seguidores publicando, ademais, contidos para a divulgación de coñecementos sobre distintos temas relacionados coa alimentación saudable e o consumo responsable.
• Corporación Alimentación Peñasanta S.A. por Larsa, a marca de Pastoreo vinculada a Galicia desde hai case medio século. Ponse en valor o seu propósito para defender o patrimonio natural da nosa terra galega para poder seguir disfrutando das súas paisaxes e sabores. O xurado indica que a estratexia seguida pola marca é un éxito en termos de venda, imaxe de marca e brand equity.
• Pereira Productos del Mar S.A. por Gastronomía en el Camino de Santiago. Trátase dun recetario con 12 elaboracións que os peregrinos medievais incluían nas súas comidas. Neste caso, destaca a iniciativa, que cobre un vacío bibliográfico sobre a gastronomía do Camiño durante os primeiros anos da peregrinaxe, unindo nun mesmo documento rigor histórico e científico, usos e costues e gastronomía.

A maiores, a xunta directiva do Clúster Alimentario de Galicia decidiu entregar, por unanimidade, o Premio Honorífico Galicia Alimentación a Juan Vieites, quen fora secretario xeral de Anfaco-Cecopesca desde 1991 ata o 2022. Con este galardón búscase recoñecer a súa contribución ao Clúster Alimentario de Galicia coma socio fundador, así coma a súa labor a favor do impulso da I+D+i no sector alimentario galego, en particular no complexo mar industria.

VII Foro Galicia Alimentación

Antes da entrega de galardóns, celebrouse o VII Foro Galicia Alimentación, que reuniu a expertos e profesionais dentro da industria que analizaron e puxeron en común as súas reflexións e ideas acerca dos retos e o futuro do sector.

Para lograr un achegamento ao presente e ao futuro, o evento ofreceu tres relatorios e unha mesa redonda sobre estas cuestións: tendencias globais no ano 2022, a nanotecnoloxía e a súa aplicación no sector, as estratexias de futuro e o marketing de transformación social e, por último, os desafíos nun entorno cambiante coma o actual. Estas temáticas foron abordadas polos seguintes relatores: a Customer Success Manager de Innova Market Insights, Marta Delgado del Río; o Chair of the Research Office no International Iberian Nanotechnology Laboratory, Lorenzo Pastrana Castro; o presidente de AGR Food Marketing e AGR Transformación Social, Mateo Blay Berto; o director de Palafox Food & Wine, Jaime Palafox Gamir; o director de Entrepinares, José Manuel García-Bejines; a directora de Casa Grande de Xanceda; Cristina Fernández-Armesto; a directora de ODS Protein, Iría Varela Campo; e o director de Cafés Candelas, Ramón Alonso Castro.

Cóctel bebidas e produtos de Galicia

Ao remate do Foro e os Premios Galicia Alimentación realizouse un cóctel no que o público asistente tivo ocasión de degustar algúns dos produtos que se presentaran aos galardóns de Clusaga, así coma dos colaboradores do evento.

Os alí presentes puidiron degustar produtos das seguintes compañías e marcas: Larsa, Hijos de Rivera, Grupo Leche Río, Maruxío, Torre de Núñez, Innolact S.L., Torre de Núñez, Gadisa, Vía Romana Mencía Añada, Galician Brew, González Carballal, Grupo Entrepinares, Queixerías Barral, Lugar da Veiga, Real Conservera Española, Aceites Abril, Distribuciones Lorri, Jealsa, Mejillón de Galicia D.O.P., Algas la Patrona, Traloagro, Clavo Food Company e Pereira Productos del Mar.