Vegalsa-Eroski e Clusaga impulsan unha nova edición da campaña para achegar ao consumidor a innovación e a excelencia dos alimentos galegos

• “Produtos do Ano de Galicia 2026. Innovación e Excelencia” estará presente durante todo o mes de agosto en 24 establecementos Eroski de toda Galicia, reunindo os produtos galardoados e finalistas dos Premios Galicia Alimentación 2026.

Santiago de Compostela, 31 de xullo de 2026. O Clúster Alimentario de Galicia (Clusaga) e a compañía galega de distribución alimentaria Vegalsa-Eroski presentaron este venres no hipermercado Eroski A Sionlla, en Santiago de Compostela, a campaña “Produtos do Ano de Galicia 2026. Innovación e Excelencia”, unha iniciativa que pon en valor a calidade, a creatividade e a capacidade innovadora dos produtos galegos recoñecidos nos Premios Galicia Alimentación 2026, celebrados o pasado 11 de xuño.

A campaña, que se desenvolverá durante todo o mes de agosto, permitirá aos consumidores descubrir unha selección de produtos distinguidos nestes galardóns, reforzando o compromiso de Clusaga e Vegalsa-Eroski coa promoción do sector alimentario galego e convertendo os supermercados nun escaparate da riqueza, diversidade e talento da industria alimentaria de Galicia. No acto participaron representantes de Clusaga, encabezados polo seu CEO, Juanjo de la Cerda, e o seu director, Roberto Alonso; representantes de Vegalsa-Eroski, entre eles o director de negocio Eroski, Florentino Vázquez, e o director de Compras, Jorge Eiroa; e o director da Axencia Galega da Calidade Alimentaria (Agacal) da Consellería de Medio Rural, Martín Alemparte. Todos coincidiron en destacar a importancia desta colaboración para dar maior visibilidade ás empresas galegas, impulsar a súa competitividade e achegar ao consumidor produtos que representan a excelencia e a innovación do sector alimentario.

Durante o mes de agosto, a campaña estará presente en 24 hipermercados Eroski e supermercados Eroski Center distribuídos por toda Galicia, concretamente nos establecementos de A Coruña (Xuxán), Arteixo, Betanzos, Cambre (A Barcala), Culleredo (Acea de Ama), Noia, Padrón, As Pontes, Santiago de Compostela (A Choupana e A Sionlla), Teo, Oleiros (O Seixal), Ponteareas, Ribadeo, Ribadavia, Xinzo de Limia, Ourense (Seixalbo), Vilanova de Arousa, Vilagarcía de Arousa, Sanxenxo (Vilalonga), Vigo (Portanet), Nigrán e Poio (A Barca), onde os clientes poderán identificar os produtos galardoados e finalistas mediante unha sinalización específica no punto de venda.

Entre os produtos e proxectos premiados destacan as Galletas de Xián, de Sacrapastas, recoñecidas co Premio Excelencia Terra pola súa elaboración artesanal mediante prensado manual e inspiradas na arte románica e na mitoloxía galega; o viño Paco & Lola Prime 2021, distinguido co Premio Excelencia Líquida por representar a máxima expresión da adega a través dun albariño 100 % do Val do Salnés con 24 meses de crianza sobre leas finas; o proxecto Liderado emocional e Pastoreo, de Larsa, galardoado na categoría de Iniciativa, Proxección e Estratexia de Mercado por reforzar o liderado da marca a través dun modelo de produción baseado no pastoreo; e o Modelo de produción responsable, de Daveiga, recoñecido como Iniciativa Sustentable pola súa aposta pola economía social, o residuo cero e o compromiso co territorio.

A campaña tamén permitirá descubrir propostas como Bagazitos, os primeiros snacks elaborados a partir de bagazo de cervexa mediante un proceso de economía circular; o queixo Pazo do Val, con DOP Arzúa-Ulloa; o pan artesán Aboa Migalla, elaborado baixo as IXP Pan de Cea e Pan Galego; a auga funcional Vida G, enriquecida con flavanois; a bebida láctea Optimilk PRO Té Matcha; a froita liofilizada Al Lío; o iogur para mascotas PetFlurry ou a Serie Limitada Escurís, unha conserva premium de bonito galego.

Ademais, as marcas participantes poderán utilizar o selo oficial dos Premios Galicia Alimentación 2026, unha distinción que identifica os produtos recoñecidos e reforza o seu prestixio e a confianza dos consumidores.
Con esta acción, Clusaga e Vegalsa-Eroski converten os establecementos Eroski nun escaparate da alimentación galega actual, achegando aos consumidores unha mostra representativa da riqueza e diversidade do sector. A campaña reúne nun mesmo espazo produtos que combinan tradición, innovación, sustentabilidade e identidade: desde elaboracións inspiradas no patrimonio cultural galego ou amparadas por figuras de calidade diferenciada ata propostas baseadas na economía circular, os alimentos funcionais ou as novas tendencias de consumo. Un reflexo da capacidade das empresas galegas para innovar sen renunciar ás súas raíces e do dinamismo dun ecosistema alimentario que sitúa a Galicia como referente en calidade, creatividade e valor engadido.