A Xunta de Galicia pon en marcha “Mercaproximidade”, unha canle alternativa para comercializar os produtos agrogandeiros galegos
O Diario Oficial de Galicia (DOG) publicou o 30 de abril a orde da Consellería do Medio Rural que crea a rede “Mercaproximidade”, unha canle alternativa de comercialización creado pola Xunta de Galicia co obxectivo de axudar a dar saída aos produtos agrogandeiros galegos que viron reducidas as súas vendas a causa do peche da hostalería e os mercados municipais durante a emerxencia sanitaria. Ademais, coa rede “Mercaproximidade” non só permitirase ao consumidor acceder facilmente a estas producións nos establecementos de alimentación que permanecen abertos, senón tamén identificar a súa orixe con claridade.
Deste xeito, poderán acollerse á iniciativa en calidade de provedores os produtores de froitas e hortalizas, os produtores de mel e produtos apícolas, así como os gandeiros de vacún, porcino, ovino e caprino, entre outros. Han de estar rexistrados, iso si, no Rexistro de explotacións agrarias de Galicia (Reaga) e, no caso dos produtos non transformados, estar integrados na sección de venda directa (Sevedi). A maiores, poderán incorporarse á rede as industrias de transformación de produtos agrogandeiros rexistradas no Rexistro de industrias agrarias.
A Consellería do Medio Rural promoverá esta canle alternativa de comercialización entre as grandes cadeas de distribución, coas que xa se reuniu a Consellería do Medio Rural para concretar a súa participación e con todas aquelas que desexen sumarse á iniciativa. A maiores, busca a colaboración das empresas dedicadas á subministración de colectividades ou das plataformas online de venda de produtos agroalimentarios para instalas a comprar e poñer no mercado estas producións de proximidade.
Como solicitar a adhesión a Mercaproximidade
Os socios do Clúster Alimentario de Galicia (Clusaga) interesados en adherirse a “Mercaproximidade” teñen que enviar un email a covid@clusaga.org indicando os seus datos básicos e tipo de produción.
Os interesados en participar en “Mercaproximidade” estarán obrigados a cumprir toda a normativa hixiénico-sanitaria, de calidade alimentaria e demais protocolos que resulten esixibles segundo o seu tipo de produción.
Campaña para consumidores
A Consellería lanzará unha campaña dirixida aos consumidores finais para concienciarlles da calidade destes produtos e facerlles ver que coa súa compra poden contribuír á viabilidade do sector agrogandeiro galego. Por iso, os produtos de ” Mercaproximidade” estarán perfectamente identificados, para que os consumidores saiban da súa orixe, así como do seu vínculo coa iniciativa. Á súa vez, a Consellería poderá comprar directamente os produtos adheridos á rede para a súa cesión a comedores sociais, centros sanitarios ou residencias no contexto de loita contra o coronavirus.
