Clusaga e ANFACO-CECOPESCA impulsarán a Bioeconomía e o Crecemento Azul a través do proxecto europeo IMPRESS

• O Clúster e seu socio ANFACO-CECOPESCA son a representación galega do consorcio multidisciplinar desta iniciativa, conformado por 14 entidades e liderada por Teagasc

• IMPRESS, cofinanciado polo programa Horizonte Europa, desenvolverá solucións tanxibles para o avance das economías de base biolóxica mariña e de auga doce en Europa

• O proxecto, de catro anos de duración, celebrou esta semana en Dublín a súa reunión de arranque

O Clúster Alimentario de Galicia (Clusaga) reforza o seu compromiso coa promoción da produción e o consumo sostibles sumándose ao proxecto europeo IMPRESS. Xunto á súa entidade socia ANFACO-CECOPESCA, representan a Galicia no consorcio multidisciplinar do proxecto, integrado por 14 membros procedentes de 7 países, entre os que se encontran institutos académicos e de investigación, asociacións empresariais, organizacións sen ánimo de lucro e pemes.

As entidades socias traballarán xuntas para abordar os retos relacionados coa sustentabilidade aos que se enfrontan os sectores mariño e de auga doce, sendo o obxectivo de IMPRESS centrarse nas estratexias de Bioeconomía e Crecemento Azul da Unión Europea.

Coordinado por Teagasc, a Autoridade Irlandesa para o Desenvolvemento da Agricultura e a Alimentación con ampla experiencia na produción sostible de alimentos e técnicas innovadoras de procesamento, o proxecto desenvolverá solucións tanxibles para o avance das economías de base biolóxica mariña e de auga doce en Europa, aproveitando as especies de niveis tróficos inferiores infrautilizadas. Así, este proxecto de catro anos de duración e cofinanciado polo programa Horizonte Europa, representa unha oportunidade para impulsar prácticas sostibles e crear valor no sector, á vez que aborda retos ambientais e sociais.

O consorcio celebrou esta semana en Dublín a súa primeira reunión, que contou coa participación de representantes de Clusaga e ANFACO-CECOPESCA, e serviu para deseñar a folla de ruta de IMPRESS e sentar as bases para a execución do proxecto.

Unha proposta de valor única con cero residuos

Para satisfacer a crecente demanda de alimentos de orixe acuática fronte á sobrepesca e a preocupación pola produción de residuos e outros danos ambientais, son necesarias solucións innovadoras que aborden toda a cadea de valor. Para iso, IMPRESS ofrecerá oportunidades para que as empresas adopten enfoques máis circulares e de residuo cero, así como para que os consumidores adopten novos hábitos. Para iso, o proxecto céntrase en dúas áreas importantes.

Por unha banda, aproveitará o potencial de especies acuáticas de niveis tróficos inferiores, como o rutilo, o espadín e o lumpo, para crear novos produtos alimentarios e non alimentarios (biopesticidas, biofertilizantes, alimento para peces).

Ao mesmo tempo, IMPRESS traballará para mellorar a formulación de residuo cero, utilizando fluxos de augas residuais e subprodutos sólidos do procesado comercial para extraer ingredientes de alto valor e probar o potencial destas augas ricas en nutrientes para favorecer o crecemento de microalgas ou lentellas de auga. O proxecto tamén desenvolverá e pilotará mesturas e compostos de biopolímeros para producir películas de polímeros compostables para aplicacións de envasado de alimentos e revestimentos para aumentar a vida útil.

Enfoque orientado ao mercado

O desenvolvemento de novos produtos levarase a cabo tras un amplo estudo das gamas existentes, as tendencias do mercado e a normativa, ademais de incorporar as achegas de produtores, transformadores e consumidores, empezando por sesións de intercambio de ideas e grupos de discusión. Clusaga contribuirá ao proxecto realizando esta conexión coas tendencias de mercado e os intereses da industria.

Utilizaranse diversos métodos e protocolos para extraer e avaliar metabolitos de especies de baixo nivel trófico e levarase a cabo unha ampla caracterización microbiolóxica e química dos destinados a aplicacións alimentarias. A continuación, utilizaranse ingredientes de alto valor para a formulación de alimento para peces, mentres que as microalgas e lentellas de auga integraranse en produtos veganos similares ao peixe para potenciar o sabor e reducir o contido de sal.

Utilizaranse polo menos seis especies de baixo nivel trófico para crear novos produtos de peixe listos para o consumo e, para levalos ao mercado, o proxecto creará modelos de negocio circulares que apoien á industria á vez que abordan a responsabilidade ambiental e social.

Conexión co consumidor

Os cambios de comportamento e actitude dos consumidores non se poden impulsar sen antes coñecer as súas necesidades e preocupacións. Por iso, antes de desenvolver os novos produtos, levarase a cabo unha enquisa paneuropea para coñecer as perspectivas e preferencias de miles de consumidores en relación cos produtos mariños e de auga doce sostibles.