O director da Oficina Técnica do PERTE Agroalimentario acode a coñecer a candidatura galega para dixitalizar a industria láctea

• SmarTZ4milk, o proxecto tractor promovido por Clusaga que opta ao PERTE Agroalimentario, integra 9 empresas lácteas e 5 tecnolóxicas co obxectivo de incrementar a competitividade, sustentabilidade e resiliencia do sector lácteo a través de I+D+i en dixitalización, sustentabilidade e rastrexabilidade

• O director da Oficina Técnica do Comisionado para o PERTE acudiu á sede lucense da empresa líder do proxecto, Grupo Leche Río, onde presidiu a reunión de traballo do consorcio do proxecto

Esta mañá, a sede de Grupo Leche Río en Lugo, acolleu a reunión do consorcio de SmarTZ4milk, o proxecto tractor promovido polo Clúster Alimentario de Galicia (Clusaga) para optar ao PERTE Agroalimentario desde Galicia, e cuxo obxectivo é modernizar a actual cadea de produción, transformación e distribución da industria láctea para dotala de ferramentas de competitividade baseadas na tecnoloxía e a sustentabilidade.

O encontro estivo presidido por Galo Gutiérrez, director da Oficina Técnica para o PERTE Agroalimentario do Ministerio de Industria, Comercio e Turismo (MINCOTUR), que puido coñecer de primeira man as metas, investimentos e proxectos primarios de SmarTZ4milk, así como os principais resultados esperados. A reunión tamén contou coa participación de Santiago Álvarez, responsable da Oficina de Proxectos Tractores e Atracción de Investimentos do Instituto Galego de Promoción Económica (Igape); Roberto Alonso, director de Clusaga; e Carmen Lence, CEO de Grupo Leche Río, empresa líder do proxecto; así como con representación das empresas que integran o consorcio do proxecto.

En concreto, SmarTZ4milk integra a 9 empresas lácteas e 5 tecnolóxicas, dúas Universidades e dous Centros Tecnolóxicos. Todas elas proceden de 10 Comunidades Autónomas diferentes, aínda que é Galicia a que presenta maior volume de investimento e representación nesta candidatura ao PERTE.

Reunión do consorcio

Xosé Ramón Vázquez, responsable da Oficina Técnica Next Generation Galicia Food que prestou apoio a Clusaga para promover o proxecto SmarTZ4milk, presentou durante a reunión os pormenores da candidatura presentada, desde o seu alcance ao impacto esperado na industria láctea. Posteriormente, o director da Oficina Técnica puido coñecer da man de cada empresa o detalle das súas actuacións, nunha sesión moderada polo director técnico da proposta, Hugo Criado, CEO de Medrar Smart Solutions.

Pola súa banda, Roberto Alonso, director de Clusaga, valorou o fito que supón para Galicia o presentar un proxecto tractor “forte, sólido e potente” ao PERTE Agroalimentario, destacando a relevancia industrial e socioeconómica do sector lácteo para a comunidade, que é líder en España e referente internacional. Sobre SmarTZ4milk, destacou a súa capacidade para transformar a realidade do sector lácteo, incrementando a súa competitividade nos mercados “a través da aposta pola I+D+i no ámbito da dixitalización, así como polos investimentos no ámbito da sustentabilidade”.

Carmen Lence destacou que “nun mundo cada vez máis globalizado, é esencial que manteñamos e fortalezamos o noso sector agroalimentario, por iso ten tanta importancia esta unión de empresas, organizacións e administración”. Subliñou que é vital “fomentar a innovación e a adopción de novas tecnoloxías que melloren a eficiencia e a sustentabilidade da nosa operativa diaria para que o sector lácteo galego siga liderando proxectos como este de o PERTE Agroalimentario e siga sendo unha potencia a nivel europeo”, á vez que sinalou que “desenvolver un proxecto altamente tecnolóxico desde o sector, como é SmarTZ4milk, é unha oportunidade para transformar o sector lácteo galego e español”. Ademais, engadiu que para Grupo Leche Río é “unha honra liderar esta iniciativa e ser unha empresa tractora para a industria láctea”.

O encontro co director da Oficina Técnica do PERTE Agroalimentario complementouse con visitas ás instalacións de Grupo Leite Rio e ás fábricas de Clun e Queixerías Bama, onde se puideron coñecer os procesos produtivos en cada caso.

Incremento da competitividade, sustentabilidad e trazabilidade do sector lácteo

O proxecto Cadena de valor láctea inteligente, trazable, sostenible y conectada (SmarTZ4milk) permitirá, entre outros aspectos, dotar ao sector das ferramentas competitivas para abordar de forma eficiente a adaptación e mitigación do cambio climático, en liña cos obxectivos 2030 e 2050. O seu principal obxectivo é dar un impulso esencial á transformación dixital da industria láctea a través da automatización de procesos, sensórica avanzada e xestión eficiente, así como desenvolver unha nova ferramenta de rastrexabilidade integral.

O orzamento global do proxecto supera os 25 millóns de euros, articulándose a través de 24 proxectos primarios, dos cales 18 son individuais e seis son conxuntos. Destes, sete correspóndense con proxectos de competitividade, 15 de sustentabilidade e dous de rastrexabilidade.

Así, a colaboración público-privada e á unión do sector teñen como resultado o proxecto tractor SmarTZ4milk, candidato ao PERTE Agroalimentario e produto da simbiose da industria láctea co ecosistema I+D+i. Esta iniciativa tractora é a proba de que o sector lácteo ha decidido afrontar os seus retos de forma colaborativa, a través da coordinación entre empresas competidoras e tendo en conta as diferentes tipoloxías, tamaños e capacidades produtivas. Todo iso co obxectivo último de transformar o sector desde orixe a consumidor final.

Empresas implicadas

En concreto, forman parte de SmarTZ4milk as empresas lácteas socias de Clusaga Grupo Lence (líder), Leche Celta S.L.U., Lácteos de Santander S.A., Corporación Alimentaria Peñasanta S.A. (CAPSA Vida), Grupo Cooperativas Lácteas Unidas S.C.G. (CLUN), Agrupación de Cooperativas Lácteas (ACOLACT), Cooperativa Agraria Provincial De A Coruña S.C.G., Queizuar S.L. e Queixerías Prestes S.L.A. Asimesmo, como provedores de tecnoloxía, participan Tecnologías Plexus, S.L., Grupo AMSLAB, Sixtema Proyectos de Información S.L., Contactica S.L. e ASM Soft S.L.