A relevancia da sustentabilidade no sector alimentario é cada vez maior, do mesmo xeito que os consumidores cada día son máis conscientes do impacto que as súas compras de alimentos e bebidas teñen non só na saúde, senón tamén no ecosistema e contorna social. Neste sentido e co obxectivo de coñecer cales son as tendencias en sustentabilidade que condicionan as decisións de compra do consumidor, o Clúster Alimentario de Galicia realizou unha análise sobre estas.
Segundo datos de GlobalData no 2018, o 43% dos consumidores tomaba decisións de compra influenciados polas condicións éticas e de responsabilidade social e ambiental do produto. Con todo, o impacto da sustentabilidade difire por categorías de alimentos e por grupos de consumidores segundo a idade e aspecto socioeconómico.
Actualmente, os lácteos e alimentos frescos, como froitas, vexetais e proteínas de orixe animal, son os máis impactados. Isto explica o motivo polo que gran parte das innovacións en sustentabilidade enfócanse cara a procedementos certificados e alternativas proteicas. Prevese que cada vez adquiran maior relevante o resto de categorías, especialmente as vinculadas co packaging e métodos de produción.
Doutra banda, os claims relacionados con sustentabilidade que máis destacan na actualidade son: “comercio xusto”, “producido localmente”, “libre de crueldade” e “procede de fontes sustentables”. É por iso, que o 87% dos consumidores espera con gran expectativa que as empresas invistan en sustentabilidade, segundo datos de GlobalData.
Á hora de tomar decisións de compra, hai diferenzas segundo a idade. Na xeración E ou Milennials (nacidos entre 1981 e 1999), o 46% declara que a súa decisión de compra está influenciada polo ética e responsable que sexa a empresa. Pola súa banda, na xeración X (nacidos entre 1966 e 1980), a 40% toma a súa decisión en función dos efectos que o produto provoca na saúde. En cambio, nos consumidores senior, como boomers (nacidos entre 1946 e 1965) ou xeración silenciosa (nacidos entre 1925 e1945), só un 34% afirma verse influenciado na súa decisión de compra polas tendencias de sustentabilidade.
En concreto, as tendencias de sustentabilidade con maior impacto no comportamento do consumidor son:
- Confianza e transparencia. O 61% dos consumidores está parcial ou completamente decidido a quedar con marcas que coñece e nas que confía, segundo Global Data. As etiquetas, redes sociais e páxinas web xogan un papel crave para transmitir información verídica e de forma clara, así como para que o consumidor conzoca de onde vén o produto e como foi producido.
- Responsabilidade ambiental. O uso fontes de enerxía renovables, os empaquetados “intelixentes” e a minimización de residuos/cero desperdicios, son o foco desta tendencia.
- Responsabilidade social. A estrutura interna e o modelo de negocio xogan un papel fundamental na imaxe de marca. Os máis novos buscan investir en marcas que teñan un punto de vista social definido, que sexan coherentes cos valores que propoñen e que se expoñan obxectivos durables no tempo con efectos positivos na comunidade de impacto.
- Comercio xusto e apoio local. Interesados por coñecer até a remuneración salarial, os consumidores máis conscientes buscan apoiar marcas que compartan datos específicos da comunidade produtora e que invistan parte das súas ganancias en proxectos sociais.
